Heitast í umræðunni
George W. Bush forseti Bandaríkjanna, og John Kerry öldungadeildarþingmaður, tókust harkalega á um utanríkismál, einkum Íraksmálið, varnir landsins og stríðið gegn hryðjuverkum, í fyrstu kappræðum sínum sem fram fóru í Miami-háskóla í Coral Gables í Flórída, í gærkvöldi. Fréttastjórnandinn Jim Lehrer úr þættinum NewsHour á PBS, stjórnaði kappræðunum sem stóðu í 90 mínútur. Er þetta í níunda skipti sem Lehrer er spyrill í kappræðum bandarískra forsetaefna. Frambjóðendurnir stóðu við ræðupúlt og svöruðu spurningum Lehrer til skiptis og máttu svara hvor öðrum en ekki spyrja hvorn annan beint. Að því loknu fluttu þeir tveggja mínútna lokaorð. Það er kaldhæðnislegt að fyrsta lota kappræðnanna skyldi fara fram í Flórída. Þar réðust úrslit forsetakosninganna 2000, eftir margra vikna karp um talningu atkvæða og undarlegt kosningakerfi sem flækti mjög málin. Stefnir allt í álíka jafnar kosningar í fylkinu nú og voru árið 2000, ekki er marktækur munur á forsetaefnunum í nýjustu könnunum í Flórída. Hófust þessar fyrstu kappræður með vinsamlegum orðum frambjóðandanna til íbúa í Flórída, en náttúruhamfarir hafa riðið yfir íbúa fylkisins á undanförnum vikum. Vitað var fyrir kappræðurnar að Kerry myndi sækja af krafti allt frá upphafi, hann yrði að sanna sig og vera beittur og óvæginn til að ná til hins óákveðna kjósenda og ná að veikja málstað forsetans. Hann byrjaði með hörðum árásum á forsetann, sakaði hann um stórfelldan dómgreindarbrest í starfi sínu og að valda ekki leiðtogahlutverki sínu. Bush forseti, virkaði rólegur og ákveðinn við harkalegum skotum keppinautarins og benti á vel sjáanlegar misfellur í málflutningi hans í utanríkismálum seinustu árin, miðað við það sem heyrist nú, einkum þegar vikið var að umræðunni um Íraksmálið. Að mínu mati var boðskapur forsetans betri, en Kerry kom sínu betur til skila með hvassri og beittri framgöngu. Ekkert breytir þó því að boðskapur Kerry er mjög götóttur.

Þetta var í fyrsta skipti sem forsetaframbjóðendurnir hittust og ræddu málefni kosningabaráttunnar, í fyrsta skipti sem þeir hittast í návígi í aðdraganda kosninganna. Niðurstöður skoðanakannana seinustu vikna báru keim af því hvernig frambjóðendurnir komu boðskap sínum til skila. Staða mála fyrir kappræðurnar var þannig að Kerry varð að leggja sig allan fram til að eiga möguleika á því að ná fylgissveiflu til sín, til að eiga möguleika á sigri í kosningunum eftir 32 daga. Hann var beittari og gekk fram af meiri hörku. Má því segja að hann hafi haft meira frumkvæði í fyrstu kappræðunum og orðið meira áberandi. Kannanir hafa sýnt að Bush þykir sterkari kostur þegar kemur að utanríkis- og varnarmálum en Kerry, og því varð Kerry að sækja af hörku til að ná frumkvæði í umræðunni og minna á sig og stefnumál sín með afgerandi hætti. Það tókst honum. Hvorugum frambjóðandanum tókst þó að vera það kraftmikill að teljast ótvíræður sigurvegari þessarar fyrstu lotu. Var athyglisvert að fylgjast með frambjóðendunum takast á í fyrsta skipti og heyra muninn á grunnáherslum þeirra. Frambjóðendurnir munu eigast við að nýju eftir viku, að kvöldi 8. október. Fer ég til Washington á miðvikudag, ég verð því staddur í Bandaríkjunum þegar aðrar kappræðurnar fara fram. Verður fróðlegt að fylgjast með þeim kappræðum í enn meira návígi en verið hefur þau 12 ár sem ég hef horft á kappræður bandarískra forsetaefna. Þá munu Bush og Kerry hittast í St. Louis í Missouri á borgarafundi, þar sem kjósendur spyrja spurninganna. Verður athyglisvert að sjá skoðanakannanir á næstu dögum hvort slagurinn jafnist út eða hvort forsetinn haldi miklu forskoti sínu. Mun niðurstaða nýrra skoðanakannana hafa mikið um að segja hvernig slagurinn muni þróast á þeim tíma sem eftir er til kjördags.

Upptaka af fyrstu kappræðum George W. Bush og John Kerry
Hápunktar í fyrstu kappræðum George W. Bush og John Kerry
Kappræður George W. Bush og John Kerry - endurrit af umræðunum

Ályktanir stjórnar Varðar
Stjórn Varðar, félags ungra sjálfstæðismanna á Akureyri, kom í gærkvöldi saman til síns fyrsta fundar undir minni stjórn, eftir aðalfund félagsins fyrir viku. Þar voru samþykktar tvær ályktanir, svohljóðandi:

Vörður, félag ungra sjálfstæðismanna á Akureyri, fagnar því að stofna eigi einkahlutafélag um gerð hálendisvegar um Stórasand. Hvetur Vörður fyrirtæki í bænum til að taka þátt í þessu verkefni. Er enginn vafi á að mikilvægt er að ná fram sem mestri styttingu á leiðinni milli Akureyrar og Reykjavíkur. Það er nauðsynlegt að lækka flutningskostnað milli Akureyrar og Reykjavíkur og ekki síður milli Norðausturlands og Austfjarða til Reykjavíkur. Ef af vegagerð um Stórasand yrði myndi leiðin milli Akureyrar og Reykjavíkur styttast um rúmlega 80 kílómetra. Sjálfstæðisflokkurinn í Norðausturkjördæmi lagði mikla áherslu á þessa vegagerð í seinustu alþingiskosningum og hefur oft síðan ítrekað þessa tillögu sem nauðsynlega til að stytta leiðina milli Akureyrar og Reykjavíkur, sem er mikið þarfaverkefni. Halldór Blöndal forseti Alþingis, flutti á seinasta þingvetri tillögu til þingályktunar um að samgönguráðherra yrði falið að undirbúa og hrinda í framkvæmd nauðsynlegum rannsóknum og mælingum vegna vegagerðar frá Norðurárdal í Skagafirði um Stórasand til Borgarfjarðar. Vörður ítrekar þá stefnu félagsins að tillagan um Norðurveg komi til framkvæmda á næstu árum og verði að veruleika. Hér er um mikið forgangsmál að ræða fyrir okkur á landsbyggðinni og mikilvægt að hefjast handa og sameinast um að koma þessu í gegn sem fyrst.

Vörður, félag ungra sjálfstæðismanna á Akureyri, lýsir yfir mikilli ánægju sinni með þá kraftmiklu umræðu sem átt hefur sér stað hér á Akureyri seinustu vikur og mánuði um skipulagsmál, ekki síst sem miðar að því að efla miðbæinn okkar, sem er óneitanlega hjarta okkar góða samfélags hér. Var mjög ánægjulegt að sjá hvernig nokkrir athafnamenn í bænum tóku höndum saman í því markmiði að efla bæinn og stigu það skref að stofna með sér hóp og ákváðu að efna til íbúaþings um málið. Þar gafst bæjarbúum hið gullna tækifæri til að koma að ferlinu, tjá skoðanir sínar og hugmyndir um blómlegri og kraftmeiri miðbæ. Er þessi vinna og undirbúningur hennar mjög nauðsynleg að öllu leyti til að efla miðbæinn okkar og er lofsvert framtak. Er ánægjulegt að hinn almenni borgari fái jafn greiðan aðgang að því að ákveða sjálfur hvað verði gert og fái til þess jafngott tækifæri og hér um ræðir. Er þetta til marks um hið beina íbúalýðræði sem hér er varðandi skipulag bæjarins. Eins og fram kom í kynningu á niðurstöðum þingsins, er fólk mjög áhugasamt um að efla miðbæinn og margar spennandi hugmyndir komu þar fram sem verður fróðlegt að sjá unnar betur í væntanlegri hugmyndasamkeppni. Vörður telur þau skref sem stigin voru á íbúaþinginu, og það sem framundan er, mikilvæg þegar kemur að því að því að móta starf til framtíðarskipulags miðbæjarins.

Dagurinn í dag
1880 Möðruvallaskóli í Hörgárdal, fyrsti gagnfræðaskóli á Íslandi, tók til starfa við hátíðlega athöfn - skömmu eftir aldamótin var skólinn fluttur til Akureyrar og varð að Menntaskólanum á Akureyri
1933 Ásta Magnúsdóttir var skipuð ríkisféhirðir - Ásta var fyrsta konan sem hlaut opinbert embætti
1981 Ökumönnum og farþegum í framsætum bifreiða var gert skylt að nota bílbelti við akstur á vegum - átta árum síðar, árið 1989, var farþegum í aftursæti bifreiðar gert skylt að nota bílbelti
1982 Helmut Kohl leiðtogi kristilegra demókrata, tók við embætti kanslara Þýskalands af jafnaðarmanninum Helmut Schmidt. Kohl gegndi kanslaraembætti til ársins 1998, eða í 16 ár
1987 Fimmtudagskvöld hættu að vera sjónvarpslaus í Ríkissjónvarpinu þegar útsendingar hófust þau kvöld, í harðri samkeppni við Stöð 2. Þá fyrst voru sjónvarpsútsendingar hjá RÚV öll kvöld vikunnar

Snjallyrði dagsins
Bláu augun þín blika ljós og skær,
lýsa leiðina mína líkt og stjörnur tvær.
Þó að liggi leið mín um langan veg
aldrei augnanna þinna eldi gleymi ég.
Ólafur Gaukur Þórhallsson (Bláu augun þín)