Áramótakveðja
Árið 2002 er að renna sitt skeið. Að baki er eftirminnilegt ár í stjórnmálunum og gott ár hjá mér persónulega. Ég mun minnast þessa árs með mikilli hlýju þegar fram líða stundir. Ég opnaði í febrúar heimasíðu sem hefur hlotið góðar viðtökur og margir heimsækja hana og líta á skrif mín, bæði þar og eins hér á bloggsíðunni sem ég opnaði í október. Ég þakka öllum þeim sem hafa litið á síðurnar, hafa sent mér póst og rætt málin fyrir tryggð við heimasíður mínar og þakka góðar kveðjur ykkar. Hef fengið mörg bréf og góðar ábendingar og kynnst fjölmörgum sem áhuga hafa á skrifum mínum og vilja ræða pólitík við mig. Þakka bæði ykkur og eins að sjálfsögðu öllum vinum mínum og kunningjum fyrir góða vináttu á árinu sem ég met mjög mikils. Vil einnig sérstaklega þakka fjölskyldu minni og nánustu ættingjum fyrir stuðninginn á árinu og ómetanlega tryggð við mig, ég væri ekkert án hlýhugs ykkar. Það er mér mikilvægt að eiga góða að. Framundan er kosningaár þar sem línurnar eru skýrar, valið snýst um áframhaldandi farsæla forystu Sjálfstæðisflokksins og hinsvegar óljósa framtíð og valdabrölt á vinstri vængnum. Ég treysti Íslendingum fyrir því að velja rétt - trygga forystu míns flokks og mun leggja allt mitt af mörkum í þeim slag sem framundan er. Í þeim kosningaslag verður ekkert gefið eftir og barist af miklum krafti. Ég óska ykkur öllum gleðilegs árs og farsældar á nýju ári, 2003. Ég þakka kærlega góða samfylgd á árinu sem senn líður. Vonandi eigum við samleið á nýju ári!

Maður ársins 2002
Við áramót er litið yfir sviðið og spurt hver sé maður ársins, hver skaraði framúr og stendur hæst þegar nýtt ár tekur við. Það er enginn vafi í mínum huga að Stefán Karl Stefánsson leikari, sé sá sem þann heiður eigi að hljóta. Á árinu stofnaði hann Regnbogabörn og hóf mjög óeigingjarna baráttu gegn því mikla böli sem einelti er. Hann hefur ferðast um landið og fræðir ungmennin í þessum málum. Hann er sá sem vagninn leiðir og er boðberi þessara strauma sem nú eru að myndast gegn einelti af öllu tagi. Hann á mikinn heiður skilið fyrir sitt framlag, það er því ánægjulegt að Stöð 2 og Bylgjan hafi valið hann sem mann ársins. Almenningur valdi mann ársins á Rás 2, Ingibjörgu Sólrúnu Gísladóttur fráfarandi borgarstjóra og sameiningartákn hins sundurskorna R-listans. Ég skil vel að ISG hafi verið ofarlega í hugum fólks eftir að hafa misst borgarstjórastólinn úr höndunum eftir ævintýralegt klúður, hún var mikið í fréttum og er öllum kunn. Vissulega er hún ein af manneskjum ársins eftir hráskinnaleikinn í kringum brotthvarf hennar úr stóli borgarstjóra. Eftir að hafa misst allt niður um sig verður hún maður ársins fyrir það, óskiljanlegt. Hefði haldið að afrek Stefáns Karls hefðu verið ofar í hugum fólks.

Nýr borgarstjóri - Alfreð stjórnar - ISG ýtt til hliðar
Tíðindin hafa gerst hratt í borgarmálunum í dag. Í dag varð ljóst að Ingibjörg Sólrún Gísladóttir myndi víkja af borgarstjórastóli og gera tillögu um nýtt borgarstjóraefni, Þórólf Árnason fyrrum forstjóra Tals. Í upphafi var ekki samstaða um þessa tillögu og menn vildu lengri tíma, en Framsókn studdi tillöguna frá upphafi. Þá stillti Framsóknarflokkurinn leiðtogum flokkanna upp við vegg og þeir voru nauðbeygðir til að samþykkja tillöguna. Það er því ljóst að Alfreð stjórnar R-listanum nú við brotthvarf borgarstjórans og er með þetta allt í höndum sér. Ingibjörg segir af sér embætti og víkur burt sár í bragði yfir því að vera beygð. Hún stekkur nú í óvissuna og hverfur af braut, situr áfram í borgarstjórn en er ekki lengur forystumaður borgarinnar. Framundan er brothætt stjórn þriggja flokka sem virðast ekki vera sammála um margt, enda margoft legið í loftinu að uppúr sjóði. Það má búast við spennandi tímum ef þetta verður það sem bíður borgarbúa næstu 40 mánuðina, þann tíma sem R-listinn hengur saman valdanna vegna. En nú tekur valdalaus embættismaður við af drottningunni. Á bakvið tjöldin stjórnar Alfreð, óvinsælasti stjórnmálamaður borgarkerfisins. Gaman verður að sjá hvort þetta hangi til 2006, ég leyfi mér að efast um það. Allir sjá að nýi borgarstjórinn er valdalaus með öllu.

Ekki öfundsvert hlutskipti
Allir sjá að hlutskipti forstjórans fyrrverandi verður ekki öfundsvert. Hann á að leiða þrjá ósamhenta flokka í borgarstjórn og tala máli þeirra sem framkvæmdastjóri rétt eins og Egill Skúli forðum. Völdin verða ekki á hans herðum, heldur leiðtoganna þriggja nú þegar borgarstjóranum sigursæla hefur verið sparkað í burtu. Hann verður enginn leiðtogi í þessu samstarfi, völdin verða hjá formanni borgarráðs. Það verður því spennandi hver fái þann stól, enda þar munu völdin liggja í samstarfinu. Sá sem fær þann stól verður í raun nýi leiðtoginn og eflaust munu margir sækja fast að því að setjast í þennan nýja leiðtogastól. Vonandi er að framkvæmdastjóra borgarinnar farnist betur við fjárhagsstjórnunina en forvera hans sem þverskallaðist við staðreyndum um fjárhag borgarinnar eins og frægt varð. Vonandi þarf ekki að rífast um grundvallartölur og almennar staðreyndir við bissnessmanninn.

Ögurstund hjá R-listanum
Sannkölluð ögurstund er framundan hjá borgarstjórnarmeirihlutanum. Ljóst er af fréttum seinustu dagana að kreppa er þar innanborðs og engin samstaða lengur um borgarstjórann. Hún nýtur ekki lengur trausts meirihluta borgarstjórnar. Í kjölfar þess að hún tilkynnti um þingframboð sitt hafa samstarfsflokkar Samfylkingarinnar innan R-listans lýst því yfir að hún verði að víkja af borgarstjórastóli. Framsóknarflokkurinn hefur þó gengið lengst og vill að hún víki af borgarstjórastóli og ljá ekki máls á því að hún fari í leyfi og Kópavogsbúinn Helga Jónsdóttir yrði borgarstjóri. Þeir vilja skilyrðislaust að hún víki ef hún fari í þingframboð í vor. Ólgan innan Framsóknarflokksins vegna framboðs ISG hefur aukist jafnt og þétt seinustu vikuna og ljóst að þar munu menn ekki bakka með fyrri yfirlýsingar. Málið er því komið í harðan hnút, borgarstjóri ljær ekki máls á að segja af sér borgarstjóraembætti og framsóknarmenn vilja að hún fari. Um helgina munu örlög R-listans ráðast og ljóst að annaðhvort fer borgarstjóri sjálfviljug af stóli og nýr leiðtogi taki við eða nýr borgarstjórnarmeirihluti verði myndaður, væntanlega milli Framsóknarflokks og Sjálfstæðisflokks. Í gær settu Framsóknarmenn og vinstri grænir fram tilboð sitt til að leysa vandann innan R-listans. Það gerði ráð fyrir því að Árni Þór Sigurðsson tæki við starfi borgarstjóra þann 15. janúar 2003. Jafnframt yrði Steinunn Valdís Óskarsdóttir forseti borgarstjórnar og Alfreð Þorsteinsson formaður borgarráðs. Þessu boði hefur borgarstjóri hafnað. Ljóst virðist orðið að valdaferli núverandi borgarstjóra ljúki bráðlega. Aðeins er spurningin hvernig honum lýkur. 2. janúar er boðaður næsti borgarstjórnarfundur og það liggur í loftinu að þá verði málið útkljáð. Þetta mun því ráðast á næstu dögum.

Góð jól
Seinustu dagana hefur ég haft það gott og borðað góðan mat og lesið þær bækur sem ég fékk í jólagjöf. Veðrið hefur verið mjög milt og gott og mikil friðsæld og gott að fara á milli og hitta ættingja og vini. Framundan eru áramótin og bendir flest til þess að áfram verði veðrið gott um áramótin og góð skilyrði verði til að skjóta flugeldum. Hef um jólin lesið Ísland í aldanna rás, Tilhugalíf, Stolið frá höfundi stafrófsins, Lovestar og ævisögu Stephans G, frábærar bækur.

Ómerkileg umræða á Innherjavefnum
Undanfarin þrjú ár hef ég tekið þátt í stjórnmálaspjallinu á Innherjavef visir.is og komið þar fram með skoðanir mínar á stjórnmálum og þjóðmálum almennt. Það er margt blaðrað um á Innherjavefnum og nóg af fólki þar sem nýtur nafnleyndarinnar í botn og reynir að höggva mann og annan með óábyrgu þvaðri og oft á tíðum ótrúlegu skítkasti. Innherjum er fátt heilagt og oft á tíðum verður þetta mjög ómerkilegt. Ég hef frá upphafi skrifað undir nafni þarna, fyrst sem stebbif og svo stebbifr, en sagði fyrst frá fullu nafni mínu í sumar. Ég vil ekki taka þátt í óábyrgu þvaðri og vil standa við allt sem ég segi og hika ekki við að koma fram í eigin persónu, taldi það réttast að standa við allt sem ég segi. Ég fæ oft skömm í hattinn fyrir að vera trúr flokknum og forystumönnum hans og finn að skoðanir mínar og skrif stinga marga, en ég finn æ oftar fyrir því að það er öfund í minn garð vegna stjórnmálaþátttöku minnar og því að ég er opinber persóna þarna, margir sem notfæra sér það til að traðka á persónu minni. Það snertir mig þó ekkert, enda nauðsynlegt að vera með harðan skráp og taka ekki mark á óábyrgum nöldrurum sem geta ekki einu sinnt haft stjórn á skapi sínu eða geði. Umræða seinustu daga er þó á þann hátt að ávallt þarf að draga persónu mína inn í spjallið og reynt að niðurlægja mig með allskonar þvaðri, oft er þetta óhemju leiðinlegt og ómerkilegt. Mér dettur ekki í hug að hætta skrifum þarna þrátt fyrir allt skítkastið.

Jólakveðja
Ég vil nota tækifærið og óska fjölskyldu minni, vinum og kunningjum gleðilegrar jólahátíðar. Ennfremur sendi ég flokksfélögum mínum í Sjálfstæðisflokknum um allt land góða kveðju og þakka fyrir gott samstarf á árinu. Ég met vináttu ykkar mjög mikils. Einnig vil ég þakka þeim sem hafa sent mér tölvupóst og skipst á skoðunum við mig vegna stjórnmálaskrifa minna og rætt við mig málin fyrir góð samskipti og ekki má gleyma þeim mikla fjölda fólks sem hafa sýnt heimasíðum mínum tryggð og eru dyggir lesendur þeirra. Ég er ykkur öllum mjög þakklátur. Hafið það sem best yfir hátíðirnar!

Ingibjörgu Sólrúnu ekki hlíft - barist um eftirmann ISG
Ljóst er nú orðið að borgarstjóri nýtur ekki lengur stuðnings meirihluta borgarstjórnar til að gegna því embætti. Hún heldur fast við þingframboð og því augljóst að til uppgjörs mun koma innan R-listans. Borgarstjóri bauðst til að taka sér frí frá störfum í kosningabaráttunni og láta borgarritara eftir stjórn borgarinnar. Það er þó ljóst svo getur ekki verið, enda vilja framsóknarmenn ekki slíkt og vilja ekki veita borgarstjóra slíkt frí og ljóst að þeir vilja ráða nýjan til starfans og ISG láti jafnframt af störfum fljótlega á nýju ári. Það er ekki valkostur að hún sitji áfram í skjóli þeirra að óbreyttu. Borgarritari býr í Kópavogi og því augljóst að menn vilja hana ekki til starfans. Málið er í algjörum hnút og ljóst að annaðhvort muni borgarstjóri verða neydd til afsagnar í kjölfar vantrauststillögu eða hættir sjálfviljug. Framundan er jólahátíðin, trúarhátíð kristinna manna. Það er þó ljóst að ekki verður jólafríið langt í borgarstjórn og gefið mál að til harkalegs uppgjörs komi á næstu dögum innan R-listans. Andrúmsloftið er eldfimt í skugga jólanna, svo mikið er víst. Ég fer yfir málið allt í ítarlegum pistli á frelsi.is í dag.

Hátíð ljóss og friðar - jólakveðja á Íslendingi
Framundan er hátíðlegasti tími ársins, trúarhátíð kristinna manna um allan heim. Jólin eru í senn hátíð ljóss og friðar. Á slíkri hátíðarstundu hugsum við flest hlýlega til okkar nánustu og fjölskyldur hittast og eiga saman notalega stund. En aðventan getur hinsvegar verið öllu þungbærri. Fæstir nýta desembermánuð til þess að bíða og hugleiða raunverulegan anda jólanna, eins og hugtakið aðventa vísar til. Því miður getur streitan sem fylgir jólaundirbúningnum verið gífurleg. Fólk gleymir sér í skreytingum, jólakortaskrifum, jólabakstri og búðarrápi, svo eitthvað sé nefnt. Í slíku andrúmslofti, sem getur skapast við þess háttar aðstæður, er mjög brýnt að minnast þeirra sem að þarfnast hjálpar okkar með. Jólahátíðin er gleðitími okkar allra. Í dag birtast á Íslendingi, jólapælingar mínar, er jafnframt um að ræða jólakveðju mína til sjálfstæðismanna á Akureyri og í öllu Norðausturkjördæmi.

25 ára afmæli mitt
Í dag er ég 25 ára gamall, ótrúlegt en satt. Það sem árin líða, segi ég. Í dag hef ég fengið mörg símtöl frá vinum og kunningjum, góðar óskir og gjafir frá þeim sem ég þekki og eru mér nákomnir. Það er alltaf gaman að finna fyrir góðum straumum og því að fólk muni eftir manni. Það er alltaf jafn ánægjulegt að finna fyrir því á degi sem þessum. Ég þakka öllum þeim sem mundu eftir deginum og góðum heillaóskum og kveðjum. Öllum er auðvitað frjálst að senda mér kveðju eða ræða málin eins og áður með því að senda mér póst á netfangið mitt; stebbifr@simnet.is

Ingibjörgu Sólrúnu sparkað
Þáttaskil hafa nú orðið í borgarmálum. Eftir rúmlega átta ára setu á borgarstjórastóli er ljóst að valdaferli Ingibjargar Sólrúnar Gísladóttur lýkur á næstu dögum. Framsóknarflokkurinn í Reykjavík hefur samþykkt ályktun þess efnis að hún verði að víkja af borgarstjórastóli ef hún vilji fara inn á vettvang landsmálanna. Framsóknarflokkurinn styður hana ekki lengur til starfans og ljóst að meirihluti borgarstjórnar er ekki lengur á bakvið borgarstjóra í það embætti. Valgerður Sverrisdóttir sparar borgarstjóra ekki stóru orðin á heimasíðu sinni í dag og ljóst að Framsóknarflokkurinn heggur nú í hana af fullkomnu miskunnarleysi, ekkert er lengur sparað, höggin eru harkaleg. Framundan er annaðhvort nýr borgarstjóri að hálfu R-listans eða nýtt meirihlutasamstarf og upplausn R-listans. Það er ljóst að seinustu dagar ársins 2002 verða sögulegir í íslenskum stjórnmálum. Uppgjörið er nú handan við hornið, hvort það verður blóðugt eða gengur yfir með kurteislegu yfirbragði mun ráðast um sjálf jólin. Framtíð R-listans og pólitískur ferill Ingibjargar Sólrúnar eru nú í fullkominni óvissu. Eitt er þó ljóst; algjör trúnaðarbrestur hefur orðið milli meirihlutaflokkanna í borgarstjórn Reykjavíkur og engin samstaða um næstu aðgerðir.

Styttist í uppgjör innan R-listans - nýr meirihluti?
Þáttaskil virðast hafa orðið hjá R-listanum með þeirri ákvörðun borgarstjóra að halda fast við fyrri yfirlýsingar um framboð og ætla jafnframt að sitja áfram sem borgarstjóri í óþökk meirihluta borgarstjórnar. Framsóknarflokkurinn í Reykjavík útilokar nú ekki nýjan meirihluta með Sjálfstæðisflokk í borgarstjórn, skv. heimildum fréttastofu Stöðvar 2 og Bylgjunnar. Nú þegar ljóst er að borgarstjóraferli Ingibjargar Sólrúnar Gísladóttur er að ljúka verður það hennar að velja á milli borgarstjórastóls eða þingframboðs, annað er ekki mögulegt, enda meirihluti borgarstjórnar á móti því að hún sitji áfram ef til framboðs kemur. Framsóknarflokkurinn hefur nú örlög Ingibjargar fullkomlega í hendi sér og þeirra að ákveða hvort henni verður sparkað eða þeir éta ofan í sig öll gífuryrðin. Ljóst er að mikil ólga er innan Framsóknarflokksins vegna skoðanakönnunar DV í gær og virðist hún hafa breytt öllu. Uppgjör í þessu máli verður á næstu dögum, enda gengur ekki að höfuðborg landsins sé stjórnlaus og stjórnarkreppa sé langvinnandi ástand. Þetta verður að leysa hratt og örugglega, annaðhvort með afsögn borgarstjóra eða nýjum borgarstjórnarmeirihluta. Sjálfstæðisflokkurinn hefur ávallt komið fram af ábyrgð við stjórn borgarinnar, bæði í meirihluta og minnihluta frá stofnun 1929 og mun ekki skorast undan því að tryggja farsæla stjórn borgarinnar ef til þess kemur að R-listinn splundrast.

eins og hver önnur langavitleysa - frábær grein Björns
Í Vettvangsgrein sinni í dag fer Björn Bjarnason yfir frétt liðinnar viku; sviptingarnar í R-listanum sem skeka undirstöður borgarstjórnarmeirihlutans allverulega. Jarðskjálftakippirnir magnast og spennan eykst. Nú þegar jólaundirbúningurinn er að verða búinn er sannkölluð unun að setjast niður með jólaölglas og piparkökur og lesa þessa frábæru grein Björns í Mogganum. Allir að lesa hana - algjört möst!

Halldór sparkar í Ingibjörgu Sólrúnu
Halldór Ásgrímsson utanríkisráðherra og formaður Framsóknarflokksins, var ekki að tvínóna í Kastljósviðtali í kvöld. Það er alveg ljóst að Ingibjörg Sólrún Gísladóttir nýtur ekki lengur trausts hans eða borgarfulltrúa flokksins til að sitja sem borgarstjóri R-listans áfram. Með þessu er ljóst að meirihluti borgarfulltrúa styður ekki borgarstjóra lengur og ljóst að til harkalegs uppgjörs mun koma. Ingibjörg Sólrún mun þurfa að velja á milli þingframboðs og stóls borgarstjóra, þetta liggur nú einfaldlega ljóst fyrir og ekkert sem breytir því á nokkurn hátt. Hvað við tekur nú er augljóst. Annaðhvort verður sameinast um nýjan leiðtoga R-listans eða samstarfið springur í frumeindir. Líklegast er að seinni kosturinn verði ofan á og framundan nýr borgarstjórnarmeirihluti og þingframbjóðandum sem situr á stóli borgarstjóra verði sparkað. Það var reyndar gert í kvöld af utanríkisráðherra. Uppgjörið er framundan.

R-listinn riðar til falls
Ég fjalla um mál málanna í pólitíkinni hér heima í dag í ítarlegum pistli á heimasíðu Stefnis. Eins og öllum ætti að vera kunnugt hefur skapast mikil pólitísk ólga seinustu dagana í Reykjavík. Borgarstjórnarmeirihluti R-listans skelfur og nötrar vegna ákvörðunar Ingibjargar Sólrúnar Gísladóttur um að þiggja 5. sæti Samfylkingarinnar í Reykjavíkurkjördæmi norður. Framsóknarflokkur og VG hafa sett borgarstjóranum afarkosti og vilja að hún velji á milli borgarstjórastólsins og þingframboðsins. Forsaga þessa máls er öllum kunn, en nauðsynlegt er að fara yfir þessi mál, nú þegar málið er komið á hreint, hvað varðar ákvörðun borgarstjóra um að svíkjast undan merkjum og fara fram þrátt fyrir fyrri loforð. Það er ljóst að borgarbúar gengu að kjörborðinu sannfærðir um að borgarstjórinn sæti áfram á sínum stól ef meirihluti ynnist, þessu lofaði hún síðast í umræðuþætti kvöldið fyrir kosningar á afgerandi hátt, svo ekki varð um villst. Framsóknarflokkur, VG og Samfylking endurmynduðu fyrr á þessu ári hræðslubandalag sitt til að tryggja sömu völd og áhrif og verið hefur frá 1994, hlutur af þeim samningi að borgarstjóri yrði sameiningartákn listans og væri ekki fulltrúi flokks í áttunda sætinu, baráttusætinu. Hvað gerist næst er alls óvíst. Þó er ljóst að R-listi þessara þriggja flokka er í alvarlegri pólitískri kreppu og allt getur gerst nú þegar jólahátíðin er að ganga í garð. Athyglisvert verður að fylgjast með þessum farsa yfir jólahátíðina, fyrir okkur sem áhuga höfum á pólitík.

Valdajafnvægi innan R-listans raskast - krafist þess að borgarstjóri víki
Í kjölfar þess að fyrir lá að Ingibjörg Sólrún Gísladóttir ætlaði sér í þingframboð fyrir Samfylkinguna varð ljóst að viðbrögð samherja hennar í R-listanum myndu vekja athygli, enda hún að fara í framboð gegn tveim samstarfsflokkum í borginni. Ekki stóð á viðbrögðum. Í morgun mátti heyra í formanni VG, utanríkis- og landbúnaðarráðherra og ýmsum þingmönnum sem voru mjög harðorðir í garð borgarstjóra og sögðu að hún væri að svíkjast undan merkjum og ganga á bak orða sinna. Í hádeginu boðuðu borgarfulltrúar Framsóknarflokks og VG til blaðamannafundar þar sem sameiginleg yfirlýsing þeirra vegna málsins var kynnt. Það kom skýrt fram að flokkarnir telja að borgarstjóri hafi brugðist trúnaði þeirra og nauðsynlegt væri að stokka upp samstarf R-listaflokkanna vegna þessara tíðinda. Ennfremur kom skýrt fram að borgarstjóri hefði með þessu tilkynnt að hún ætlaði að víkja sem borgarstjóri og var ljóst að flokkarnir kröfðust þess að hún myndi víkja. Þeim þykir eðlilegt að hún víki vegna þessa, enda augljóst að trúnaður í garð hennar er ekki lengur fyrir hendi. Verður athyglisvert að fylgjast með þessu máli næstu dagana og hvert stefna mun fram að jólum. Ljóst er að valdajafnvægið hefur raskast verulega innan bræðingsframboðsins og bæði R-listinn og borgarstjórinn riða til falls og óeiningin vex með hverri stundu. Þetta er eldfimt ástand sem minnir ansi mikið á máltakið um púðurtunnuna sem bíður þess að springa...

Íslendingur um áramótin
Um þessar mundir vinnum við sjálfstæðismenn hér á Akureyri að því að gefa út Íslending um áramótin. Síðast kom hann út sem blað fyrir sveitarstjórnarkosningarnar í vor. Frá árinu 2000 hefur Íslendingur komið út á Netinu, og er því vefriti okkar stýrt af Helga Vilberg af miklum myndugleika. Þar birtast skoðanir okkar og pælingar hverju sinni og fréttir af flokksstarfinu. Internetið hefur styrkst mjög seinustu árin og því þessi miðill okkur mikilvægur í aðdraganda þeirra kosninga sem í hönd fara. Jafnframt er mikilvægt að gefa út blað og minna á framboð okkar, skoðanir og stefnumál í aðdraganda þessa bardaga sem er auðvitað hafinn. Hann hófst með því að listi okkar var kynntur í lok nóvember, fyrstur allra í kjördæminu, hinu nýja Norðausturkjördæmi. Ég hlakka til að lesa blaðið, framundan eru spennandi kosningar þar sem við stefnum að því að halda okkar hlut og verja stöðu allra þingmanna okkar. Markmiðið er - fjóra á þing, alveg hiklaust!

Örugg stjórn Bush - bandarísk stjórnmál í brennidepli
Athyglisvert hefur verið að fylgjast með stjórnmálum í Bandaríkjunum seinustu vikurnar. Í nóvember gengu Bandaríkjamenn að kjörborðinu og Repúblikanaflokkurinn vann sögulegan kosningasigur í báðum þingdeildum. Demókratar sleikja sárin og eru farnir að huga að því hver muni mæta Bush forseta í næstu forsetakosningum og leiðtogi repúblikana í öldungadeildinni rær lífróður til að bjarga pólitískum ferli sínum. Framundan eru spennandi 24 mánuðir í bandarískri pólitík, að mínu mati. Ég fjalla um bandaríska pólitík og það sem við blasir í ítarlegum pistli á heimasíðu Heimdallar í dag. Hvet alla til að kíkja á þann boðskap.

Borgarstjóri í varaþingmannsframboð
Nú blasir við að Ingibjörg Sólrún Gísladóttir hafi loksins eftir mikið japl, fam og fuður fikrað sig í áttina að ákvörðun, þó svo að ekki séu öll kurl komin til grafar. Þau eru nefnilega ekki alveg að segja sömu söguna borgarstjórinn og formaðurinn í Samfylkingunni. Hún er enn að hugsa málið og ákvörðun liggur ekki enn fyrir, heldur bara hálfsagðar sögur. Hinsvegar er tilhlökkunarefni að borgarstjórinn fari í varaþingmannsframboð og verði í varamannasveitinni næstu fjögur árin. Nú er boltinn hjá borgarstjórnarflokki R-listans og þeirra að ákveða hvort að flokkarnir þrír vilji allir hafa þetta sameiningartákn áfram á friðarstóli. Kjósendur í Reykjavík kusu borgarstjórann í vor vegna yfirlýsinga hennar um að hún yrði um kyrrt og síðast fyrir nokkrum dögum var hún sömu skoðunar. Nú er söðlað um við sennilega lítinn stuðning samherja í R-listanum í öðrum flokkum. Sjálfstæðisflokkurinn mun mæta Ingibjörgu Sólrúnu ef hún tekur þessa ákvörðun. Í þeim slag verður ekkert gefið eftir og ekkert sparað. Það er alveg ljóst. Það var alltaf ljóst að þessar kosningar yrðu spennandi, nýjustu fréttir staðfesta að svo muni verða.

Demókratar leita að leiðtoga - Trent Lott í slæmum málum
Nú þegar ljóst er að Al Gore (æ þið munið, sá sem sleikti konuna sína opinberlega) fer ekki í forsetaframboð, sýnist mér að ýmsir demókratar þurfi áfallahjálp áður en þeir velja nýjan forsetaframbjóðanda. Ljóst er að margir verða kallaðir en fáir útvaldir. Virðist slagurinn vera á milli Lieberman, Kerry og Gephardt. Annars er líklegt að Daschle fari fram líka. Það eru víst litlar líkur á að Hillary fari fram nú. Mitt í óförum demókrata seinustu vikurnar hefur Trent Lott leiðtogi Repúblikana í öldungadeildinni, komið sér í mikið klandur og rær nú lífróður til að bjarga pólitískum ferli sínum. Lott lét umdeild ummæli falla í afmælisveislu Strom Thurmond í byrjun mánaðarins og mátti skilja þau á þann veg að hann styddi aðskilnað svartra og hvíta í Bandaríkjunum. Vandræði Lotts jukust til mikilla muna um helgina þegar forystumenn innan flokksins, þ.á.m. Don Nickles næstáhrifamesti maðurinn í þingflokknum, létu í ljósi efasemdir um forystu hans. Áður hafði Bush forseti sagt á blaðamannafundi að ummæli Lotts endurspegluðu ekki skoðanir meirihluta þjóðarinnar. Lott var endurkjörinn leiðtogi flokksins í öldungadeildinni í nóvembermánuði, en nú hefur verið ákveðið að endurtaka atkvæðagreiðsluna þann 6. janúar nk. Lott rær því lífróður og reynir allt sem hann getur til að bjarga sér frá pólitískri hneisu. Líkurnar á því að Lott hrökklist frá aukast dag frá degi.

Styttist í jólin - einstök veðurblíða - Stuðmenn klikka aldrei
Nú er ég kominn í þetta líka sallafína jólaskap, enda bara vika til jóla. Var svo vitur að skrifa öll jólakort í lok nóvember og búinn að senda þau öllsömul og svo eru allar gjafirnar búnar nema ein, mjög sérstök gjöf handa sérstakri manneskju. Fer ekkert nánar út í það. Annars er veðrið hérna fyrir norðan alveg draumur og alveg snjólaust. Alveg eins og á sumardegi. Sá í gærkvöldi frétt í tíufréttum þar sem fjallað var um að iðnaðarmenn vinna hér utandyra í blíðunni eins og á sumardegi væri. Var rætt við Mugga frænda um þessi mál í fréttinni, enda er hann formaður félags byggingarmanna hér í firðinum. Ég hef upplifað desember hér í Eyjafirði í tvo áratugi og man aldei eftir öðru eins og vona að svona verði þetta um jólin, kannski væri ágætt að fá smá snjóföl á aðfangadag, en mér er svosem alveg sama. Það koma jól engu að síður. Fór í blíðunni í göngutúr í dag og kíkti á jólastemmninguna á Glerártorgi í dag og rabbaði við fjölda fólks þar, hitti alveg ótrúlegasta fólk, meira að segja kunningja að austan sem keyrði norður í veðurblíðunni til að versla. Fór í Pennann og keypti nýja Stuðmannadiskinn sem er alveg frábær, er kominn með þvílíka æðið fyrir nýja smellinum þeirra Stuðmanna. Horfði á tónleika þeirra í Sjónvarpinu á sunnudag og hafði mjög gaman af, enda algjört Stuðmannafan. Þeir klikka aldrei. Í dag eru víst tveir áratugir síðan klassamyndin Með allt á hreinu var frumsýnd. Í tilefni þess kemur hún út á DVD. Mynd sem er alltaf frábær, besta íslenska bíómyndin að mínu mati.

Al Gore ekki í forsetaframboð
Í gær tilkynnti Al Gore fyrrv. varaforseti Bandaríkjanna, að hann myndi ekki gefa kost á sér sem forsetaefni Demókrataflokksins árið 2004. Þessi ákvörðun hafði legið í loftinu og sagði ég frá þessu hér á bloggsíðunni á föstudaginn og spáði þar að hann færi ekki fram nú, þetta liggur nú endanlega fyrir. Margir höfðu spáð að þessi ákvörðun myndi ekki liggja fyrir fyrr en á næsta ári, en hann ákvað að tilkynna þetta í fréttaskýringaþættinum 60 mínútur á CBS. Í frétt á fréttavef CNN, er fjallað ítarlega um ákvörðun Gore. Með þessu galopnast forsetaslagurinn að hálfu Demókrata og eru margir nefndir sem líklegir frambjóðendur, t.d. John Kerry, Tom Daschle, Joe Lieberman, Dick Gephardt, Hillary Rodham Clinton og margir fleiri. Það er mitt mat að staða Bush forseta sé svo sterk eftir kosningasigurinn í nóvember, að enginn muni eiga neina raunhæfa möguleika á að sigra hann, ég tel að ástæða þess að Gore fer ekki fram sé sú að flokkurinn sé í sárum eftir tapið í þingkosningunum og telji að slagurinn sé þegar tapaður. En það verður gaman að fylgjast með þessu næstu árin.

Laugardagskvöld á ljúfum jólanótum
Óhætt er að fullyrða að þáttur Gísla Marteins á laugardagskvöld hafi verið sá besti það sem af er vetri. Þátturinn var á ljúfum jólanótum, enda aðeins nokkrir dagar til jóla, og góðir gestir komu í heimsókn og ljúf tónlist hljómaði. Aðalgestur þáttarins var Davíð Oddsson forsætisráðherra og formaður Sjálfstæðisflokksins. Var spjall þeirra á léttu nótunum, og var víða komið við. Vitanlega var rætt um pólitíkina, jólin og ritstörf forsætisráðherrans. Fyrir nokkrum vikum kom út smásagnabók hans, Stolið frá höfundi stafrófsins. Ég hef lesið bókina og hafði mjög gaman af, enda mikill unnandi hnyttinna og athyglisverðra smásagna. Fyrir jólin 1997, eða fyrir fimm árum, kom út metsölubók Davíðs, Nokkrir góðir dagar án Guðnýjar sem var virkilega góð. Heyrst hefur að von megi eiga á spennusögu frá forsætisráðherranum, verður án efa athyglisvert að lesa, hlakka til þess. Björgvin Halldórsson og Diddú komu svo einnig í létt spjall og tóku lagið. Björgvin söng gamalt og gott lag Jónasar og Jóns Múla, Undir Stórasteini sem er að finna á ballöðuplötu Björgvins, en kom upphaflega út á Íslandslögum 2 árið 1994. Diddú söng ljúft jólalag, til að koma öllum í jólaskapið. Rúsínan í pylsuendanum í þessum þætti var tenórinn Kristján Jóhannsson, eðal Akureyringur. Barst talið að því sem hann er að gera þessa dagana og t.d. að útgáfu plötu til minningar um Jóhann Konráðsson, föður Kristjáns. Á þeirri plötu eru lög með Jóhanni og er óhætt að segja að það sé verðugur minnisvarði um þennan einstaka alþýðusöngvara, nú um jólin verða tveir áratugir liðnir frá því að hann lést í Skotlandi. Að lokum söng Kristján eina aríu eins og honum einum er lagið. Það er óhætt að fullyrða að þessi þáttur hafi verið skemmtilegur og mjög gaman að honum.

Góð vettvangsgrein Björns
Undanfarna sex mánuði hefur Björn Bjarnason alþingismaður og leiðtogi borgarstjórnarflokks Sjálfstæðisflokksins, skrifað greinar á miðopnu Morgunblaðsins á laugardögum undir heitinu Vettvangur. Þar hefur hann tjáð sig um það sem jafnan ber hæst í pólitíkinni og þjóðlífinu almennt. Á laugardaginn skrifaði Björn um ráðleysi R-listans í málefnum Kárahnjúkavirkjunar og Landsvirkjunar. Vegna áforma um virkjun við Kárahnjúka er meira uppnám í Ráðhúsinu en jafnan áður, þó oft sé þar nóg af hasar innanborðs hjá bræðingslistanum. Það virðist nefnilega vera erfitt fyrir þetta bræðingsbandalag þriggja flokka að komast að einni skoðun á þessum málum. Á öðrum endanum er Framsóknarflokkurinn sem er í ríkisstjórnarsamstarfi og með Iðnaðarráðuneytið á sinni könnu, ef svo má sega. Á hinum endanum eru svo vinstri/grænir sem eins og endranær eru á móti öllum virkjunaráformum sama hvaða nafni þær nefnast. Á miðjunni er svo Samfylkingin ráðalaus yfir samstarfsflokkunum. Það er nú svo skondið með VG að ekki má einu sinni breyta Norðurorku, orkufyrirtæki Akureyrarbæjar í hlutafélag nema allt ætli vitlaust að verða og læti bæði í bæjarstjórn Akureyrar og á Alþingi, þó að margreynt sé að þar sé um að ræða hagstæðasta kostinn í stöðunni. Það er með græningjana að þeir eru á móti öllum framfaramálum, enda alræmdir þvergirðingar eins og landbúnaðarráðherrann sagði í frægri þingræðu. Á þá er alltaf hægt að stóla á - að vera á móti öllum helstu framfaramálum. Ég hvet alla áhugamenn um stjórnmál til að lesa grein Björns.

Frábær spjallþáttur
Horfði í gærkvöldi á spjallþátt Jóns Ólafssonar tónlistarmanns, Af fingrum fram. Fyrir nokkrum vikum skrifaði ég um áhuga minn á þessum þáttum, enda bæði skemmtilegir og fræðandi, sannkölluð unun á að horfa. Enda kom ekki á óvart að þátturinn hlaut Edduna sem besti sjónvarpsþáttur ársins 2002. Þátturinn í gærkvöldi var sérstaklega áhugaverður. Gestur Jóns í gærkvöldi var kóngurinn sjálfur, Björgvin Halldórsson. Er óumdeilt að hann sé sá íslenskur tónlistarmaður sem hefur sungið flest lög inn á plötur og stendur einna fremst af núlifandi poppsöngvurum þjóðarinnar. Spjall þeirra var mjög áhugavert og fræðandi og gaman að fá brot af ferli hans á tæpum klukkutíma í bland við áhugaverðar poppsögur. Það var semsagt gaman að horfa á þáttinn, hiklaust einn besti þátturinn í seríunni til þessa. Í kvöld verður gaman að horfa á Sjónvarpið. Þá mun Gísli Marteinn taka á móti forsætisráðherranum, Diddú og stórsöngvara okkar Akureyringa, Kidda Konn. Þetta verður eflaust skemmtilegt laugardagskvöld - með Gísla og gestum hans.

Biðin eftir Soprano-fjölskyldunni
Eins og allir vinir mínir ættu að vita er ég forfallinn áhugamaður um hina frábæru framhaldsþætti um Tony Soprano og fjölskyldu hans og hef horft á alla þættina. Nú styttist hinsvegar í að fjórða serían verði sýnd í sjónvarpi allra landsmanna. Hin langa bið hefur verið gerð þolanlegri með því að endursýna þriðju seríuna seint á fimmtudagskvöldum nú fyrri hluta vetrar. Fljótlega á nýju ári er hinsvegar búist við nýrri seríu á skjáinn. Ýmsar sögusagnir hafa rambað hingað upp á klakann af nýjustu seríunni. Sumir segja að hún sé slöpp og þynnri en hinar fyrri en lokaþættirnir bæti það upp. Ég ætla allavega að vona að ekki fari fyrir félaga okkar Soprano eins og sálfræðingnum Frasier sem er orðinn ansi útþynntur. Sú var tíðin að ég var einn harðasti Frasier-aðdáandi ever, en ég verð að viðurkenna að það er farið að halla ansi mikið á félaga okkar í Seattle. Horfi núorðið á Six Feet Under og The Agency með miklum áhuga, en bíð spenntur eftir félaga Soprano og fagna því mjög komu hans og famelíunnar á skjáinn á nýju ári. Á meðan horfi ég á upptökur af 24, snilldarþætti sem sýndur var á Stöð 2 í sumar. Alveg brilljant-þættir!

Moggagrein um styttingu hringvegarins
Í dag birtist í Morgunblaðinu grein mín um styttingu hringvegarins, milli Akureyrar og Reykjavíkur. Hún kemur í kjölfar þess að umræða vaknaði á Alþingi um hvernig mögulega væri hægt að stytta leiðina milli staðanna. Ráðherra svaraði að hægt væri að stytta leiðina um 19 kílómetra með því að gera tvær breytingar. Við í stjórn Varðar töldum nauðsynlegt að minna á raunhæfar hugmyndir Halldórs Blöndals um Norðurveg, sem myndi stytta leiðina um 85 kílómetra. Tillaga sem er bæði snjöll og skynsöm, sú sem mér hugnast best. Mér hefur lengi þótt að hún ætti að fara í framkvæmd og taka eigi þetta með trukk en ekki stytta leiðina um nokkra kílómetra. Með því að sneiða af ýmsar krókaleiðir er hægt að stytta leiðina svo um munar og það myndi skila sér í lægri flutningskostnaði og betri samgöngum. Það yrði mun fljótlegra að fara á milli staðanna og ekki síður þægilegra. Með því að fara eftir þessum tillögum myndi koma fram raunhæf stytting á leiðinni milli þessara stóru byggðakjarna. Okkur þótti rétt að minna á þessar tillögur og því ákvað ég að skrifa þessa grein og koma fram með afstöðu okkar og ekki síst opinbera skoðanir mínar í blaðinu. Ég skammast mín ekki fyrir að benda á þessar tillögur og mun tala máli þessarar tillögu hvar og hvenær sem er. Þessi Moggagrein er mitt framlag til að minna á þessar afburðagóðu tillögur.

Tvö ár frá uppgjöri - Gore ekki í framboð?
Í dag eru tvö ár liðin frá því að lengstu kosninganótt í Bandaríkjunum lauk. Tvö ár eru liðin frá því að Al Gore þáv. varaforseti og forsetaframbjóðandi Demókrataflokksins, ákvað að játa sig sigraðan fyrir George W. Bush forsetaframbjóðanda Repúblikanaflokksins eftir að hafa reynt í 37 daga að fá því hnekkt að Bush hefði unnið kosningasigur í Flórída-fylki í forsetakosningunum 7. nóvember 2000. Sá sigur tryggði honum setu í Hvíta húsinu. Svo jafnt var á með þeim að aðeins nokkur hundruð atkvæði í Flórída réðu því hvor vann kosningarnar. Gore vildi endurtelja öll atkvæðin en Bush vildi að úrslitin stæðu óbreytt. Dómur í Hæstarétti Bandaríkjanna, 12. desember 2000 tryggði Bush sigur í lagalegri baráttu um atkvæðin í Flórída, og með því voru öll tromp slegin úr höndum Gore. Allur heimurinn beið spenntur eftir lyktum þeirrar baráttu og að lokum ákvað Gore að una niðurstöðunum. Frá þeim tíma hefur frekar lítið borið á varaforsetanum fyrrverandi og allt frá þessum desemberdegi hefur sú saga lifað góðu lífi að hann myndi fara fram á ný gegn Bush forseta, árið 2004. Nú þykja hinsvegar líkurnar á því hafa minnkað. Mörgum demókrötum þykir að hann eigi að víkja til hliðar. John Kerry öldungardeildarþingmaður, hefur tilkynnt framboð sitt og nýtur hann greinilega mikils stuðnings flokksmanna. Er talið líklegt að Gore muni ekki fara fram og birtist frétt á bandarískum vefmiðlum þess efnis í gær. Ef svo fer er líklegast að Kerry mæti forsetanum í kosningaslagnum 2004. Er almennt talið að Gore muni tilkynna ákvörðun sína um framboð eður ei, snemma á næsta ári. Verður athyglisvert að sjá hvort hann hætti formlega afskiptum af stjórnmálum eða reyni á ný að berjast fyrir því að verða forseti landsins.

Athyglisverðir og fræðandi þættir
Ég er mikill áhugamaður um Íslandssöguna og mannkynssöguna almennt. Það var því mjög gaman að setjast fyrir framan Sjónvarpið í kvöld og horfa á fyrsta þáttinn af átta í þáttaröð Hannesar Hólmsteins Gissurarsonar og Ólafs Þ. Harðarsonar um 20. öldina. Þar er um að ræða fræðandi þátt og fyrsti þátturinn var sannkallað augnakonfekt, veisla fyrir þá sem hafa áhuga á sagnfræði og sögunni almennt. Þáttur kvöldsins fjallaði um tímabilið frá 1901-1927. Það var gaman að sjá gamalt myndefni í bland við skemmtileg viðtöl við samtíðarmenn þess tíma sem um var fjallað. Alltaf er gaman að sjá slíka þætti, t.d. hafði ég mjög gaman af þáttum Jóns Ársæls Þórðarsonar á Stöð 2, árið 2000 um 20. öldina, en þeir hlutu Edduverðlaunin á sínum tíma, enda alveg meistaralega vel úr garði gerðir og áhugaverðir. Ég hlakka til að fylgjast með þáttum Hannesar og Ólafs næstu vikurnar, þeir lofa svo sannarlega góðu.

Klassamynd sem klikkar aldrei
Eftir að ég var búinn að horfa á þáttinn um 20. öldina horfði ég á eina gamla og góða úrvalsmynd. Citizen Kane er án vafa ein besta mynd kvikmyndasögunnar og hefur unnið sér mikinn sess. Hiklaust einn af hornsteinum kvikmyndasögunnar. Í myndinni er sagt frá ævi fjölmiðlakóngsins Charles Foster Kane, sú persóna var byggð á William Randolph Hearst. Þótt ótrúlegt megi virðast er Citizen Kane frumraun leikstjórans Orson Welles í kvikmyndagerð. Hann var aðeins 25 ára gamall þegar hann leikstýrði þessari mynd, skrifaði handritið og lék aðalhlutverkið. Það er hrein unun að horfa á þessa klassamynd sem verður betri við hvert áhorf. Einstök mynd sem allir verða að sjá, einhverntímann á ævinni.

Gestabókin mín
Um þessar mundir eru 10 mánuðir liðnir frá því að ég opnaði heimasíðu á Netinu og tæpir tveir mánuðir frá því að þessi síða opnaði. Ég hef lengi haft mikinn áhuga á stjórnmálum og hef gaman af því að tjá skoðanir mínar og skrifa á þessar síður og það er mér mikið ánægjuefni að öðrum líka þessi skrif og heimsækja síðuna. Mér finnst því vel viðeigandi að opna gestabók þar sem þeir sem líta geta skrifað nokkrar línur. Ég hvet alla gesti síðunnar til að skrifa í gestabókina mína.

Elín Hirst ráðin fréttastjóri Sjónvarpsins
Í morgun var tilkynnt að Markús Örn Antonsson hefði ráðið Elínu Hirst í embætti fréttastjóra Sjónvarpsins. Sú ráðning kemur ekki á óvart, enda naut Elín stuðnings flestra fréttamanna hjá fréttastofu Sjónvarps, fráfarandi fréttastjóra og ýmissa yfirmanna innan RÚV. Í útvarpsráði hlaut hún hinsvegar minnihluta atkvæða, vegna þess að nokkrum flokkshestum í ráðinu hugnaðist ekki að hún hlyti starfið vegna þess að hún hefur verið orðuð við Sjálfstæðisflokkinn. Reynsla hennar og störf í fréttamennsku voru þar ekki metin að verðleikum. Hún hefur verið stjórnandi á þrem fréttastofum og á að baki langan fréttamannsferil. Það er gott að útvarpsstjóri lætur staðnað pólitískt ráð sem útvarpsráð er óneitanlega, ekki hafa áhrif á ákvörðun sína og ræður þann umsækjandann sem mesta reynsluna á að baki. Elín var að mínu mati sú rétta í þessa stöðu og ég fagna því að hún hafi nú hlotið starfið. Hún á eftir að standa sig vel sem fréttastjóri. Ég sendi henni mínar bestu hamingjuóskir, vona að henni farnist vel á stóli fréttastjóra.

Jarðgöng boðin út
Í dag var tilkynnt að samgönguráðherra hefði falið Vegagerðinni að bjóða út jarðgöng á Austurlandi og Norðurlandi nú í vetur. Útboðin verða í tvennu lagi, samkvæmt upplýsingum frá samgönguráðuneytinu. Útboðsgögn fyrir jarðgöng milli Reyðarfjarðar og Fáskrúðsfjarðar verða send til þeirra verktaka sem hafa verið valdir til þátttöku eftir forval í næstu viku. Þá sagði Sigríður Ingvarsdóttir alþingismaður, í svæðisfréttum Norðurlands í kvöld að vinna við gögn vegna jarðganga milli Siglufjarðar og Ólafsfjarðar væri langt komin og útboðsgögnin yrðu send verktökum í lok febrúar, eftir að tilboð í fyrri göngin hafa verið opnuð. Reiknað er með að vinna við jarðgöng milli Reyðarfjarðar og Fáskrúðsfjarðar geti hafist seint í apríl árið 2003, eftir yfirferð tilboða, samninga við verktaka og undirbúning á verkstað. Áætlað er að gangagröfturinn taki u.þ.b. eitt og hálft ár og að honum verði lokið fyrir árslok 2004. Gert er ráð fyrir að göngin verði síðan tilbúin um ári síðar, eða síðla árs 2005. Heildarkostnaður við verkið er áætlaður um 3, 8 milljarðar á núgildandi verðlagi. Þá er miðað við að vinna við gerð jarðganga milli Siglufjarðar og Ólafsfjarðar hefjist árið 2004, um svipað leyti og gangagreftri lýkur fyrir austan en áætlað er að göngin milli Siglufjarðar og Ólafsfjarðar verði tilbúin árið 2008 og að heildarkostnaður við þau verði um 6,8 milljarðar á núgildandi verðlagi. Ég fagna því að þetta sé komið á hreint og að það styttist óðum í göng um Héðinsfjörð, við sem búum hér við Eyjafjörð höfum beðið eftir þessum samgöngubótum í áratugi, gott er að þeirri bið lýkur á næstu árum.

Eftirmálar prófkjörs - lokuð prófkjör
Miðstjórn Sjálfstæðisflokksins kom saman til fundar í Valhöll, höfuðstöðvum flokksins, í dag til að ræða eftirmála prófkjörs flokksins í Norðvesturkjördæmi og annmarka á kosningunni og framkvæmd þeirra. Vilhjálmur Egilsson alþingismaður, sem lenti í fimmta sæti prófkjörsins vildi að það yrði ógilt og miðstjórn úrskurðaði á þann hátt og tæki undir sjónarmið sín, vegna utankjörfundarkosningar á Akranesi og Grundarfirði. Niðurstaða miðstjórnar var sú að hún gæti ekki gripið inn í samhljóða og ágreiningslausar ákvarðanir kjörnefndar og stjórnar kjördæmisráðs Norðvesturkjördæmis og fulltrúaráða sjálfstæðisfélaganna í Húnavatnssýslu, í Skagafirði og á Akranesi vegna prófkjörsins 9. nóvember sl. Miðstjórnin segir að enginn vafi leiki á að verulegur misbrestur hafi verið á framkvæmd utankjörfundarkosningarinnar. Þó hafi ekki verið sannað á óyggjandi hátt að framkvæmdinni hafi verið beint gegn einum frambjóðenda fremur en öðrum, né fullyrt hvaða áhrif misbresturinn hafði á niðurstöðuna. Miðstjórnin taldi sér því ekki vera fært að taka fram fyrir hendurnar á kjördæmisráði flokksins í kjördæminu. Miðstjórnin tók í framhaldinu ákvarðanir sem miða að því að tryggja að slík mál komi ekki upp aftur. Miðstjórnin ákvað því að breyta prófkjörsreglum flokksins þannig að einungis félagsbundnir sjálfstæðismenn og þeir sem gerast félagar í síðasta lagi samhliða prófkjöri geti tekið þátt í prófkjöri. Þá mun kaflinn um utankjörfundarkosningu í prófkjörsreglum flokksins verða endurskoðaður til að tryggja mun betur en nú er að ekki sé unnt að mistúlka eða misskilja reglurnar um utankjörfundarkosningu. Jafnframt verði hverjum frambjóðanda veittur sjálfstæður kæruréttur til miðstjórnar vegna framkvæmdar prófkjörs. Ég er sammála ákvörðunum miðstjórnarinnar - mér þykir eðlilegast að flokksbundnir stuðningsmenn flokks, sama hvaða nafni hann nefnist velji sína frambjóðendur. Allt annað finnst mér orka tvímælis. Einnig þarf að tryggja að fyrir liggi skýrar reglur um prófkjör innan flokksins, það er mjög mikilvægt.

Kosning um fréttastjóra í útvarpsráði
Athyglisvert hefur verið að fylgjast með farsanum varðandi ráðningu fréttastjóra Sjónvarpsins. Nokkur tími er nú liðinn síðan staðan var auglýst og tilkynnt var hverjir hefðu sótt um starfið. Ljóst var nokkuð lengi að vissir flokkshestar í útvarpsráði ætluðu með öllum brögðum að reyna að koma í veg fyrir að hæfasti umsækjandinn fengi starfið. Það leikur enginn vafi á því að Elín Hirst er hæfust þeirra sem um starfið sóttu og ætti að öllu eðlilegu að fara eftir því en ekki flokkslitum. En svo einfalt virðist það ekki ætla að verða, enda blasir við að fulltrúar þriggja flokka í útvarpsráði hafi myndað bandalag til að styðja annan umsækjanda, og til að koma í veg fyrir að Elín verði ráðin. Þegar ljóst var hvert stefndi hætti Páll Benediktsson við að sækjast eftir starfinu, en hann þótti vinstriflokkunum ákjósanlegur til að koma í veg fyrir að Elín fengi starfið. Hefur verið með ólíkindum að fylgjast með þessum vinnubrögðum. Í dag var svo loks komið að því að kjósa í útvarpsráði um stöðuna og hlaut Sigríður Árnadóttir varafréttastjóri Útvarpsins fjögur atkvæði, en Elín þrjú atkvæði. Með þessu lítur pólitískt skipað útvarpsráð framhjá stjórnunarreynslu Elínar Hirst og fréttamannsstörfum hennar. Hún hefur verið stjórnandi á þrem fréttastofum og nýtur stuðnings fráfarandi fréttastjóra og ýmissa yfirmanna hjá stofnuninni. Þessi kosning staðfestir enn einu sinni að tími útvarpsráðs er liðinn og nauðsynlegt að stokka þessa stofnun alla upp. Í svona starf á að ráða útfrá hæfileikum umsækjenda en ekki flokkslitum. Sá hæfasti á að njóta sannmælis. Það er alveg greinilegt að hæfileikar og fyrri reynsla í þessum bransa séu látin lönd og leið við ráðningu í slík embætti sem hér um ræðir. Það er Markús Örn Antonsson útvarpsstjóri sem ræður fréttastjórann, væntanlega strax á morgun. Ég ætla að vona að hann velji hæfasta umsækjandann, þann sem meirihluti útvarpsráðs sniðgekk í dag.

Góður pistill um hálfkaraða fjárhagsáætlun - ítarleg ræða
Í ítarlegum pistli á heimasíðu sinni tjáir Björn Bjarnason leiðtogi borgarstjórnarflokks Sjálfstæðisflokksins sig um fjárhagsáætlun Reykjavíkurborgar fyrir árið 2003, umræðu um það þegar borgarstjóri gaf í skyn á borgarstjórnarfundi að ekki væri útilokað að hún yrði í framboði við komandi þingkosningar (sem reyndist grín af hálfu hennar!) og svokallaðan bannlista ISG. Sérstaklega athyglisvert er að lesa fyrsta hluta pistilsins sem fjallar um fjárhagsáætlunina sem lögð var fram í pörtum en ekki sem heilstætt plagg við fyrstu umræðu venju samkvæmt. Eins og Björn bendir á vantar samstæðureikning borgarinnar, sem sýnir stöðu fyrirtækja í meirihlutaeign hennar eins og Orkuveitu Reykjavíkur. Borgarfulltrúar Sjálfstæðisflokksins lýstu allir sem einn yfir mikilli vantrú sinni á fjárhagsáætlun R-listans í ljósi þess að heildarmyndin er ekki til staðar, þetta er hálfkarað plagg sumsé. Ég tel einnig persónulega mjög einkennilegt að heyra þá röksemd ítrekað kynnta af borgarstjóra og meðreiðarsveinum að fyrst ríkið hafi nú selt bankana þá sé fullkomlega eðlilegt að ríkið noti þá peninga til að kaupa hlut borgarinnar í Landsvirkjun. Ég bendi á ítarlega ræðu Björns við fyrstu umræðu um fjárhagsáætlun Reykjavíkurborgar.

Rekstrarkostnaður forsetaembættins eykst gríðarlega
Fram kom í fréttum í dag að almennur rekstrarkostnaður forsetaembættisins hefði hækkað verulega frá árinu 1996 (er núverandi forseti tók við embætti) til ársins 2001. Fram kemur í DV í dag að miðað við fast verðlag 2001 og neysluverðsvísitölu, þá nemi aukningin í heild um 20%, en 44% miðað við verðlag hvers árs. Yfirstjórnin sjálf tekur þó til sín mun meiri aukningu, eða 40% miðað við fast verðlag 2001, en ríflega 68% miðað við verðlag hvers árs. Ekki hækka þó allir liðir við almennan rekstur embættisins og má geta þess að í fyrra lækkaði kostnaður vegna opinberra heimsókna t.d. um helming, eða úr 31,6 milljónum árið 2000 í 15,7 milljónir króna árið 2001. Ég hef aldrei farið leynt með skoðanir mínar á þessu embætti og tjáði þær t.d. í tveim pistlum sem birst hafa á þessu ári. Fyrri pistillinn birtist 1. ágúst 2002 á Innherjavef visir.is, en þann dag hafði núverandi forseti setið samfellt í sex ár á forsetastóli. Sá síðari birtist 14. október 2002 á heimasíðu Heimdallar. Minni á þessa pistla mína nú, þegar við blasir hvernig þróunin er á þessu embætti í forsetatíð núverandi forseta Íslands. Þessi þróun er mjög athyglisverð, svo ekki sé nú meira sagt.

Norðurvegur - ályktun um styttingu hringvegarins
Í ljósi umræðunnar um styttingu hringvegarins seinustu daga, hefur stjórn Varðar, félags ungra sjálfstæðismanna á Akureyri, sent frá sér eftirfarandi ályktun:

Vörður, félag ungra sjálfstæðismanna á Akureyri, lýsir undrun sinni á þeim undirtektum sem fyrirspurn varaþingmanns Samfylkingarinnar, Örlygs Hnefils Jónssonar, hefur fengið í fjölmiðlum um 19 km styttingu hringvegarins. Vörður minnir á mun raunhæfari hugmyndir Halldórs Blöndals sem birtust í grein hans á Íslendingi, 10. febrúar 2002, um Norðurveg, sem styttir leiðina milli Akureyrar og Reykjavíkur um heila 85 km. Kostnaður af þeirri styttingu yrði um það bil 8.1 milljarður, þar af eru þegar inn á vegaáætlun 2,7 milljarðar vegna 30 km styttingu um Kaldadal. Ef gert er ráð fyrir álíka hlutfallslegum sparnaði af þeirri framkvæmd, myndu um 1900 milljónir sparast á ári, á móti 400 milljóna sparnaði fyrir 19 km styttingu. Þessar framkvæmdir myndu því borga sig upp á innan við 5 árum. Vörður lýsir yfir fullum stuðningi við tillögur Halldórs og bendir Örlygi á að kynna sér hana og styðja við hana sé honum stytting hringvegarins kappsmál.

Pottþétt laugardagskvöld með Gísla Marteini
Óhætt er að fullyrða að sjónvarpsþáttur Gísla Marteins Baldurssonar hafi vakið mikla lukku. Er hann algjörlega ómissandi og skemmtilegt að horfa á hann. Ég horfði í dag á upptöku af þætti gærdagsins og fannst nýjasti þátturinn vera alveg frábær. Aðalgestur Gísla var Jón Baldvin Hannibalsson sendiherra og fyrrv. utanríkisráðherra. Var spjall þeirra eins og vænta mátti mjög athyglisvert. Var rætt um samband Jóns Baldvins og föður hans, Hannibals Valdimarssonar fyrrv. ráðherra, sem var mjög stormasamt. Ennfremur var rætt um einkalíf hans og hjónaband við Bryndísi Schram en þau hafa verið gift í rúma fjóra áratugi. Ég er langt kominn í að lesa fyrra bindi ævisögu Jóns Baldvins og get fullyrt að sú bók er mjög athyglisverð og gaman að lesa hana og hvet ég alla til að kíkja á þá bók, hún svíkur engan og er mjög áhugaverð. Aðrir gestir Gísla voru Guðný Halldórsdóttir leikstjóri og Sigurður L. Hall meistarakokkur. Fyrir 16 árum var frumsýnd grínmyndin ódauðlega Stella í orlofi sem var gerð eftir handriti Guðnýjar. Sú mynd er orðin algjör klassi og horfi ég reglulega á hana, enda góðráð til að komast í gott skap, alltaf hægt að hlæja að henni. Nú er hinsvegar komið að framhaldi myndarinnar, Stella í framboði sem er leikstýrð af Guðnýju. Þar eru samankomnar sömu sögupersónurnar í fyrri myndinni og þau Edda Björgvins, Laddi og Gestur Einar í aðalhlutverkunum sem fyrr. Titillag myndarinnar; Manst´ ekki eftir mér með Stuðmönnum hefur slegið í gegn og hljómar oft í útvarpinu þessa dagana. Frábært lag, eitt besta lag Stuðmanna í fjölda ára. Hlakka til að sjá myndina í bíó rétt fyrir jólin. Þetta var því frábært laugardagskvöld með félaga mínum Gísla Marteini og gestum hans. Gísli er á góðri leið með þáttinn, svo mikið er alveg víst. Þátturinn er alveg ómissandi.

SUS gagnrýnir vöxt ríkisútgjalda
Á stjórnarfundi Sambands ungra sjálfstæðismanna sl. miðvikudag, samþykkti stjórnin einróma eftirfarandi ályktun sem ég tek heilshugar undir.

Samband ungra sjálfstæðismanna gagnrýnir þann mikla vöxt sem orðið hefur á ríkisútgjöldum síðastliðin ár. Að teknu tilliti til verðlagsþróunar og fólksfjölgunar hafa ríkisútgjöldin hækkað um 20% á fimm árum eða um rúma fjörutíu milljarða króna. Í fjárlögum þeim sem nú liggja fyrir Alþingi er gert ráð fyrir enn meiri hækkun samneyslunnar meðan einkaneyslan dregst saman. Ungir sjálfstæðismenn mótmæla sérstaklega ákvörðun um skattahækkanir, bæði á tóbak og áfengi, sem ætlað er að mæta auknum útgjöldum í fyrirliggjandi fjárlagafrumvarpi. Vekur sérstaka eftirtekt að í meðförum Alþingis hefur útgjaldahlið fjárlagafrumvarpsins hækkað um fjóra milljarða og þrjúhundruð milljónir króna frá því sem frumvarp fjármálaráðherra gerði ráð fyrir. Það stingur í augun að meðal nýrra útgjalda er að finna ýmis ,,gæluverkefni" sem afar erfitt er að rökstyðja að efli almannahag. Þessi mikla hækkun ríkisútgjalda á síðustu árum er verulegt áhyggjuefni. Í reynd á hún aðallega rætur að rekja til gríðarlegrar aukningar framlaga til heilbrigðismála. Á því sviði virðist orðin regla að reksturinn fari langt fram úr fjárveitingum á hverju ári, sem þó eru með þeim ríflegustu sem þekkjast í víðri veröld samkvæmt samanburði OECD. Betri nýting fjármuna og hagkvæmari rekstur í heilbrigðisþjónustunni er að mati ungra sjálfstæðismanna eitt mikilvægasta verkefni stjórnmálanna og er ein af forsendum þess að stöðva megi linnulausa aukningu útgjalda ríkisins. Hvað önnur svið ríkisfjármálanna varðar hafa ungir sjálfstæðismenn ítrekað bent á leiðir til sparnaðar sem miða því að minnka opinber útgjöld verulega. Mikilvægt er að Alþingi Íslendinga, sem bæði hefur með höndum fjárveitingavaldið og vald til að skattleggja almenning, breyti áherslum sínum. Það er kominn tími til þess að þróunin verði í þá átt að útgjöld minnki og hinn almenni maður haldi eftir meiru af þeim verðmætum sem hann aflar.

Húmor Ingibjargar Sólrúnar
Í dag kom í ljós að Ingibjörg Sólrún Gísladóttir er ekki komin undir feldinn og hyggur ekki á að liggja undir honum næstu dagana til að hugsa betur um framboðsmálin. Hún sagðist í fréttum í dag aðeins hafa verið að grínast á borgarstjórnarfundi með að ekki væri útilokað að hún fari fram í komandi kosningum. Gott er að vita að borgarstjóri hefur góða kímnigáfu og hefur ekki í hyggju að svíkja loforð sín við þá borgarbúa sem treystu henni til forystu í maímánuði þrátt fyrir blákaldar staðreyndir um stjórnarfar R-listans.

Borgarstjóri enn undir feldinum?
Fram kom á borgarstjórnarfundi í dag að ekki væri enn útséð með að Ingibjörg Sólrún Gísladóttir borgarstjóri, færi í þingframboð. Væntanlega þarf að blúnduleggja að fullu stíginn fyrir hana svo hún þori að stíga fram og gefa kost á sér. Ekki þorði hún í prófkjör til að láta reyna á stöðu sína hjá almenningi. Ingibjörg Sólrún er sumsé enn að íhuga að svíkja loforð við kjósendur í Reykjavík undir lok kosningabaráttunnar í vor. Sjálfstæðisflokkurinn mun óhræddur mæta kellu ef hún fer fram, enda einvalalið í forystu flokksins í Reykjavík, t.d. Björn Bjarnason. Í þann slag verður lagt af krafti og ekkert gefið eftir og eflaust minnt kjósendur á ummæli borgarstjórans í Kosningakastljósinu 24. maí sl, en þar sagði hún að hún myndi vera á stóli borgarstjóra allt kjörtímabilið ef henni yrði treyst fyrir völdunum áfram. Kjósendur í Reykjavík kusu ekki R-listann til valda heldur almennt persónuna Ingibjörgu Sólrúnu. Þetta var persónulegur sigur hennar en ekki bræðingsbandalagsins sem heildar. Ég tek því undir með Degi B. Eggertssyni borgarfulltrúa, sem sagði í Moggagrein í september að borgarstjóri væri með framboði að svíkja þá sem hana studdu til valda og ganga á bak orða sinna. Annars ræður auðvitað Ingibjörg hvað hún gerir. En auðvitað hefði verið heiðarlegra af henni að fara í opið prófkjör í nóvember (ef hún er enn að íhuga framboð) og láta reyna á stöðu sína, hefði verið meiri reisn yfir því. Hvort stígurinn verður nógu blúndulagður til að drottningunni þóknist að stíga á hann er ekki alveg endanlega ljóst. Það verður að bíða og sjá til.

Skotheldur Bond - frábær mynd
Ég fór um seinustu helgi að sjá nýjustu Bond-myndina; Die Another Day og hafði mjög gaman af. Skrifaði kvikmyndagagnrýni sem birtist á kvikmyndir.is og Menningarvef Akureyrar. James Bond - 007 - njósnari hennar hátignar, snýr aftur í þessari tuttugustu kvikmynd um hið eina sanna kvennagull. Hraðskreiðir bílar, stórhættuleg og seiðandi glæpakvendi, banvænir bardagasnillingar og forríkir glæpamenn eru auðvitað stór þáttur í hverri Bond-mynd og þessi mynd er ungin undantekning frá þeirri höfuðreglu. James Bond, þarf varla að kynna fyrir nokkru mannsbarni. Í fjóra áratugi hefur þessi lífseigi kvennabósi skemmt bíógestum um allan heim með hnyttnum tilsvörum og fáguðu skopskyni. Pierce Brosnan er hér í fjórða sinni í hlutverki njósnarans. Titillagið er jafnan hápunktur hverrar Bond-myndar. Að þessu sinni er það Madonna sem flytur aðallag myndarinnar. "I Guess I´ll Die Another Day" syngur Madonna í málmkenndu og ódæmigerðu lagi sem vinnur á við hverja hlustun, ekta popplag frá hinni óútreiknanlegu söngkonu. Semsagt, James Bond er hér í essinu sínu og hefur sjaldan verið í betra formi en í þessari afmælismynd þar sem haldið er upp á stórafmæli kvikmyndabálksins með mögnuðum tæknibrelluatriðum á glæsilegum tökustöðum. Ég hvet alla spennufíkla til að líta á njósnarann ódauðlega í þessari mögnuðu spennumynd sem ætti að vera áhugasöm fyrir alla þá sem vilja pottþéttan hasar og mögnuð brelluatriði. Þessi stórfenglega blanda af léttu gamni og harðri spennu klikkar aldrei. James Bond er skotheldur í öllu tilliti og er ómótstæðilegur fyrir mannkynið og verður það vonandi á hinu nýja árþúsundi.

Undarleg umhyggjusemi Samfylkingarkvenna
Í pistli á heimasíðu Stefnis fjalla ég um greinaskrif forystukvenna í Samfylkingunni í Moggann seinasta föstudag þar sem þær lýsa áhyggjum sínum af stöðu kvenna í Sjálfstæðisflokknum og sögðu að störf þeirra væru einskis metin og troðið væri á konum innan flokksins í kjölfar prófkjörsins í Reykjavík. Er með hreinum ólíkindum að lesa þennan þvætting sem konurnar bjóða lesendum Morgunblaðsins og áhugamönnum um pólitík upp á. Konurnar í Samfylkingunni nota prófkjörsúrslitin í borginni þar sem þessir ungu og hressu framtíðarmenn innan flokksins náðu góðum árangri á kostnað kvenþingmanna sem olíu á eld sinn gegn Sjálfstæðisflokknum. Að baki þessum skrifum er engin umhyggja fólgin fyrir konum, hvorki þingkonunum sem fóru í prófkjörið né þeim Guðrúnu Ingu og Soffíu Kristínu sem fóru í slaginn sem fulltrúar ungra kvenna í flokknum. Ónei, þarna býr að baki ásetningur þeirra að valda ónæði og koma af stað deilum um niðurstöðu prófkjörsins og koma umræðum af stað um eftirmála prófkjörsins. Því fer víðsfjarri að konum hafi verið hafnað í Sjálfstæðisflokknum, hvað svo sem þessar konur reyna að blaðra þar um. Umhyggjusemi þeirra er byggð á því að reyna að valda sem mestri úlfúð og koma af stað sem mestum leiðindum, tilgangurinn er sá og enginn annar. Þetta hlýtur allt viti borið fólk að sjá.

Frábær jólavefur Júlla Júll
Fyrir þrem árum opnaði Júlíus Júlíusson þúsundþjalasmiður á Dalvík heimasíðu á Netinu um jól, jólahefðir og allt sem yfir höfuð tengist jólunum. Jólavefur Júlla hefur vakið verðskuldaða lukku og er bæði vinsæll og vel gerður í alla staði. Það komast allir í jólaskap við að fara á vefinn hans Júlla. Hann hefur seinustu árin opnað margar vefsíður um Dalvík og áhugamál sín og er driffjöðurin í að kynna staðinn og auka hróður hans um allt land, gott dæmi er snilldarhugmynd hans um fiskidaginn mikla sem vakti mikla lukku og athygli. Hann á mikinn heiður skilinn fyrir þetta frábæra framtak sem jólasíðan er. Hvet alla til að líta á þennan magnaða vef.

Vinsældir Guðna Ágústssonar
Á sunnudaginn birtist skoðanakönnun Gallups þar sem farið var yfir hversu vinsælir ráðherrar Framsóknarflokksins eru nú á þessum tímapunkti. Er skemmst frá því að segja að Guðni Ágústsson landbúnaðarráðherra og varaformaður flokksins, er vinsælasti ráðherra hans. Ennfremur er ljóst að hann nýtur gríðarlegs stuðnings meðal kjósenda allra stjórnmálaflokka og er meira að segja vinsælli í sínum flokk en formaðurinn sjálfur. Seinustu árin hefur Guðni styrkst jafnt og þétt. Er nú svo komið að hann hefur greinilega slegið í gegn fyrir létta lund og skemmtileg tilsvör, hann er orðinn að einskonum farandskemmtikraft. Hann kyssir beljurnar í sveitinni, velur fallegustu kýrnar í samkeppni þar sem aðalverðlaunin eru Gateway-tölva, hann skemmtir á árshátíðum og þorrablótum, slær í gegn á hestamannamótum og fleira mætti nefna. Óborganlegt var hvernig Jóhannes Kristjánsson fór á kostum í hlutverki ráðherrans í seinasta áramótaskaupi, svo mjög að margir hlæja enn af atriðinu þar sem grín er gert af sölu ríkisjarðar til ónefnds flokksbróður hans. Jóhannes leikur ekki ráðherrann, hann hreinlega verður hann á kostulegan hátt. Er skemmst að minnast þess er Jóhannes lék Guðna í bráðfyndnum Maltauglýsingum að fólk hélt að þarna væri ráðherrann kominn og breyta þurfti þeim til að segja að þarna væri eftirherman en ekki ráðherrann sjálfur. Guðni er að mínu mati vinsæll einkum fyrir framkomu sína og létta lund frekar en verk á ráðherrastóli. Í dag skrifar einn af frelsispennunum, félagi minn á frelsi.is, Ágúst Flygenring, frábæran pistil um vinsældir ráðherrans og er vægast sagt undrandi á þeim. Hvet alla til að lesa þennan frábæra pistil Ágústs.

Sterk fjárhagsstaða Akureyrarbæjar
Frumvarp að fjárhagsáætlun Akureyrarbæjar fyrir árið 2003 var afgreitt í fyrri umræðu í bæjarstjórn nú síðdegis. Veltufjárhlutfall samstæðureiknings er 1,09 og eiginfjárhlutfall er 40%. Fjárhagsstaða bæjarins verður því að teljast afar sterk. Heildartekjur Akureyrarbæjar verða tæpir 7,9 milljarðar króna en heildargjöld rétt um 7,4 milljarðar skv. samstæðureikningi. Fjárhagsáætlun ársins 2003 gerir áfram ráð fyrir miklum fjárfestingum í grunngerð samfélagsins og er það í samræmi við málefnasamning meirihlutaflokkanna. Samkvæmt framkvæmdayfirliti Akureyrarbæjar eru framkvæmdir A-hluta rúmir 1,4 milljarðar. Þar af eru 220 milljónir vegna öldrunarþjónustu, rúmar 500 milljónir vegna fræðslu- og uppeldismála, 250 milljónir vegna menningarmála og 268 milljónir vegna æskulýðs- og íþróttamála. Í B-hluta eru 685 milljónir áætlaðar til framkvæmda og munar þar mestu um framkvæmdir á vegum Norðurorku fyrir tæpar 400 milljónir og Fráveitu Akureyrarbæjar fyrir rúmar 100 milljónir. Skatttekjur aðalsjóðs eru áætlaðar tæpir 3,5 milljarðar króna og framlag Jöfnunarsjóðs sveitarfélaga 360 milljónir. Aðrar tekjur Akureyrarbæjar eru rúmir 4 milljarðar skv. samstæðureikningi. Ljóst er að hemja verður útgjöld bæjarins, en á heildina litið er staða bæjarins mjög góð nú við upphaf kjörtímabilsins og meirihlutasamstarf Sjálfstæðisflokks og Framsóknarflokks sem gengið hefur mjög vel það sem af er.

4 ungliðar á leiðinni á þing
Eins og margoft hefur komið fram náðu þrír einstaklingar úr ungliðahreyfingu Sjálfstæðisflokksins góðum árangri í prófkjörinu í borginni. Guðlaugur Þór Þórðarson, Sigurður Kári Kristjánsson og Birgir Ármannsson ættu að vera allir nokkuð öruggir um þingsæti á næsta kjörtímabili. Í þennan hóp bætist nú Bjarni Benediktsson lögfræðingur, sem verður í fimmta sæti á lista flokksins í Suðvesturkjördæmi, það ætti að vera nokkuð öruggt þingsæti. Það er því nokkuð ljóst að SUS mun eiga að minnsta kosti fjóra fulltrúa sína á þingi að loknum næstu kosningum, ef miðað er við kjörfylgið 1999. Bjarni verður SUS-ari megnið af næsta kjörtímabili og Siggi Kári allt tímabilið og verður enn fulltrúi ungliða á þingi við kosningarnar 2007. Mjög ánægjulegt að þingflokkurinn yngist upp með þessum hætti. Það er bæði nauðsynlegt flokknum og ungliðahreyfingunni að brú myndist á milli SUS og þingflokksins.

Tilhugalíf Jóns Baldvins
Ég keypti í dag Tilhugalíf fyrra bindi af ævisögu Jóns Baldvins Hannibalssonar sendiherra og fyrrv. utanríkisráðherra og formanns Alþýðuflokksins. Stjórnmálaferill hans og reyndar ævi hefur verið stormasöm og einkennst í senn af sætum sigrum og sárum vonbrigðum. Hann varð alþingismaður Alþýðuflokksins árið 1982, er Benedikt Gröndal fyrrv. forsætisráðherra og formaður flokksins, varð sendiherra. Hann sigraði í prófkjöri flokksins í Reykjavík fyrir þingkosningarnar 1983 og leiddi því flokkinn í höfuðborginni við þær kosningar. Hann bauð sig fram í formannskjöri á landsfundi flokksins árið 1984 og sigraði Kjartan Jóhannsson þáverandi formann flokksins. Alþýðuflokkurinn bætti við sig fylgi í þingkosningunum 1987 og í kjölfar þeirra varð JBH fjármálaráðherra. Í septembermánuði 1988 varð hann utanríkisráðherra og sat á þeim stóli í tæp 7 ár, til vorsins 1995. Hann lét af formennsku í flokknum árið 1996. Hann varð sendiherra í Washington haustið 1997 og hætti þarmeð öllum afskiptum af stjórnmálum. Nú þegar bókin er gefin út stendur Jón Baldvin á krossgötum - hann er að yfirgefa Bandaríkin eftir 5 ára starf þar og tekur við sendiherrastöðu í Finnlandi með aðsetur í Helsinki næstu árin. Verður athyglisvert að fylgjast með þessum fyrrum stríðsmanni á nýjum vettvangi og enn athyglisverðara verður að lesa ævisöguna. Ég hef mikinn áhuga á ævisögum stjórnmálamanna og því nokkuð ljóst að þessi bók verður athyglisverð lesning fyrir mig, og eflaust fræðandi að kynnast frekar ævi Jóns Baldvins.

Davíð leiðir flokkinn í Reykjavík norður
Í dag var dregið um það í Valhöll hvort Reykjavíkurkjördæmanna, Davíð Oddsson forsætisráðherra og formaður Sjálfstæðisflokksins, muni leiða í komandi kosningum. Niðurstaðan var á þá leið að hann mun vera í forystunni í Reykjavík norður. Geir H. Haarde fjármálaráðherra og varaformaður flokksins, mun því leiða flokkinn í suðurhluta borgarinnar. Ég tel að það sé mikilvægt að flokkurinn njóti krafta Davíðs í norðurhlutanum enda sóknarfærin meiri þar og nauðsynlegra að hann verði í baráttunni þar. Það er mikilvægt að tryggja að flokkurinn nái 11-12 þingmönnum samtals í báðum kjördæmunum og gott mál að formaðurinn leiði þann listann sem mikilvægara er að höfði til kjósendanna. Framundan er spennandi slagur í Reykjavík norður, enda blasir við að formenn þriggja flokka verði þar í forystusveit sinna flokka.

Sjálfstæðisflokkurinn sterkur í Gallup-könnun
Samkvæmt nýrri Gallup-könnun er staða Sjálfstæðisflokksins sterk og heldur hann sínu fylgi meðan hinn stjórnarflokkurinn tapar og Samfylkingin bætir við sig á kostnað Framsóknar og VG. Þessi könnun hvetur alla sjálfstæðismenn til dáða í komandi átökum. Framundan eru mikilvægar kosningar, og nauðsynlegt að allir flokksmenn haldi vöku sinni og kosningabaráttan verði markviss. Í komandi kosningabaráttu mun Sjálfstæðisflokkurinn stefna að því að halda þeirri stöðu sem hann hefur í landsmálunum. Ljóst er að til að ná því lykilmarkmiði að flokkurinn sé í fararbroddi í öllum kjördæmunum hafi hann alla burði. Þó þarf að vinna af krafti til að ná settu marki. Sigur vinnst ekki nema með því að leggja sig allan fram og berjast áfram. Sjálfstæðismenn munu þurfa að hafa fyrir því að halda sinni stöðu og nauðsynlegt að allir hægrimenn og framfarasinnar taki virkan þátt í þeirri baráttu og styðji Sjálfstæðisflokkinn og fulltrúa hans til góðra verka á komandi árum.

Aðventan hafin - tími jólaskreytinganna
Í dag er fyrsti sunnudagur í aðventu og með því hefjast bæði desembermánuður og jólaundirbúningurinn formlega. Hér á Akureyri er orðið mjög jólalegt og flestir búnir að setja upp jólaljósin. Ég setti í dag upp allar jólaseríur og tók það drjúgan tíma. Það er mjög ánægjulegt að setja jólaljósin svo snemma upp, það lífgar mjög upp á skammdegið. Ég man þá tíð þegar skreytt var bara nokkrum dögum fyrir jól og fólk naut skreytinganna mun skemur en nú. Það er mikilvægt að setja upp jólaljósin snemma, svo mögulegt sé að njóta þeirra lengur. Það er hinsvegar alltaf jafnleiðinlegt að taka þau niður að jólunum loknum. Í næstu viku verður árlegur laufabrauðsskurður í minni fjölskyldu, ómissandi þáttur í jólaundirbúningnum ár hvert. Mörgum finnst slæmt að hafa engan snjó, ég er ekki einn þeirra. Vil bara hafa þetta svona. Eitt er víst - það þarf engan snjó til að halda jólin hátíðleg. Jólin koma!